Депутаттар сотторду дайындоо учурунда гендердик теңдикти эске алууну суранышууда

Бүгүн Жогорку Кенештин социалдык саясат боюнча комитетинин жыйналышында депутаттар сотторду дайындоо учурунда гендердик теңдикти эске алуунун зарылдыгын белгилешти.

Жыйналыштын жүрүшүндө бир нече мыйзамдык актыларга өзгөртүүлөрдү киргизүү боюнча Конституциялык мыйзам долбоору биринчи окууда каралып, кабыл алынды. Анда «Соттук адилеттик боюнча кеңеш», «Жогорку сот жана жергиликтүү соттор» менен «Министрлер кабинети» мыйзамдары жөнүндө өзгөртүүлөр киргизилет.

Депутат Камила Талиеванын белгилөөсү боюнча, бул мыйзам долбоорунун негизги максаты — ар тараптуу социалдык, экономикалык жана маданий чөйрөлөрдө жыныстар аралык тең укуктарды жана мүмкүнчүлүктөрдү камсыз кылууну жакшыртуу.

Ал ошондой эле, айрым соттордо судьялардын 100% бир жыныстын өкүлдөрү экенин маалымдады. Региондордо жайгашкан 20дан ашык жергиликтүү соттордо гендердик өкүлчүлүктүн минималдуу талаптары бузулуп жатат.