Бишкекте Түркиядан келген трансплантологдордун тобы бөйрөк трансплантациясын жасады

7-9-апрель күндөрүндө Кыргыз-түрк достугунун ооруканасында созылмалы бүйрек жетишсиздигинен жабыркаган бейтаптар үчүн бүйрөк трансплантациясынын үч операциясы ийгиликтүү өткөрүлдү.

Халыкаралык кызматташтык алкагында Кыргызстанга Түркиядан трансплантологдор тобу келип, аталган операцияларды жасашты.

Саламаттык сактоо министри Эркин Чечейбаев бейтаптарды зыйрат кылып, медициналык кызматкерлер менен жолугушуу өткөрдү. Ал 2023-жылы бүйрөк трансплантациясын өткөргөн бейтаптар, ошондой эле алардын донорлору жана жакындары менен да сүйлөшүп чыкты. Бейтаптар операциядан кийин ден соолукта оң өзгөрүүлөрдү жана жашоо сапатынын жакшыргандыгын бөлүшүштү.

Чечейбаев президенттин тапшырмасы боюнча Саламаттык сактоо министрлигине маанилүү милдеттер коюлганын, анын ичинде улуттук донордук системаны түзүү, адистерди даярдоо жана жаңы технологияларды киргизүү боюнча иш-аракеттерди белгиледи.

Ткань типтештирүү лабораториясына (HLA-типтөө) зарыл болгон жабдууларды сатып алуу үчүн каражат бөлүнгөн. Түрөк адистери лабораторияны орнотууга жана иштетүүгө жардам беришти.

Бул ооруканада орган трансплантациясы 2023-жылы май айында башталган жана августта диализде узак убакыт бою болуп келген жарандарга биринчи бүйрөк трансплантациялары жасалган. Операциядан кийин бейтаптар Улуттук оорукананын көзөмөлүнө өткөрүлдү.