«Манас» жана «Ош» аэропортторунун учуп-отурган жолдору жана перрондору толугу менен реконструкцияланат

Кыргызстан аэропорттору ААКнын төрагасы Манасбек Самидинов «Манас» эл аралык аэропортунда учуп-отурган жол жана перрондун реконструкциясын текшерди.
Кенен инфраструктуралык долбоордун алкагында Кыргызстан аэропорттору ААК кытайлык China Road and Bridge Corporation (CRBC) компаниясы менен келишим түздү. Бул компания «Манас» жана «Ош» аэропортторунда учуп-отурган жолдорду, перрондорду жана жарык сигналдык системаларды реконструкциялоо менен алектенет. Проект бул аэропорттордун эксплуатациялык мүнөздөмөлөрүн бардык климаттык шарттарда жакшыртууга багытталган.
Манасбек Самидинов контракт боюнча иш алып барган компаниянын өкүлдөрү менен жолугушуп, иштердин сапаттуу аткарылышы, мөөнөттөрдүн сакталгандыгы жана авиациялык коопсуздуктун камсыздалышынын маанилүүлүгүнө токтолду.
«Биз «Манас» аэропортунун учуп-отурган жолун, перронун жана жарык сигналдык жабдыгын 2025-жылдын акырына чейин толук алмаштырып жана жаңылап бүтүүнү пландап жатабыз. Реконструкциялоо боюнча China Road and Bridge Corporation жооп берет. Бүгүн биз даярдык иштеринин жүрүшүн текшердик, жана керектүү базалар, жумушчулар үчүн жатаканалар, асфальтбетон заводун жана жумуштарды баштоого керектүү бардык инфраструктураны куруу мурда эле ишке ашырылган», — деди Манасбек Самидинов.
Модернизациялоодогу негизги учур жарык сигналдык жабдыктын категориясын үчүнчү деңгээлге көтөрүү болот, бул аэропорттун бардык аба ырайында туруктуу иштешин камсыздайт.
Реконструкция «Манас» эл аралык аэропортунда бүткөндөн кийин, окшош иштер «Ош» аэропортунда жүргүзүлөт.