Жогорку Кенеш цифралык сом боюнча мыйзам долбоорлорун экинчи окууда кабыл алды

Цифралык сом блокчейн негизинде ишке ашырылат


Бүгүн Жогорку Кенештин жыйнында депутаттар улуттук цифралык валютанын статусуна байланыштуу мыйзам долбоорлорун экинчи окууда талкуулап, кабыл алышты.

Мыйзам долбоорлору боюнча маалыматты Бюджет, экономикалык жана фискалдык саясат боюнча комитеттин төрагасы Данияр Толонов сунуштады.

Бул мыйзам долбоорлору «цифралык сом» улуттук цифралык валютасынын прототипи боюнча пилоттук долбоорду ишке ашыруу үчүн, ошондой эле мыйзамдык база түзүү жана статусун аныктоо үчүн иштелип чыккан. «Цифралык сомдун» мыйзамдык статусу тийиштүү техникалык платформаны тандоого жана тестирлөө жана пилоттук этаптардын ийгиликтүү жыйынтыкталышына көз каранды болот, андан кийин толук масштабдуу иштетүүгө өтүү боюнча чечим кабыл алынат. Ошондуктан, мыйзам долбоорлорунун күчүнө 2027-жылдын 1-январында кириши сунушталууда.

Талкуу учурунда депутат Пархад Тулендыбаев улуттук цифралык валютанын алкагында финансылык операцияларга байланыштуу колдонуу мүмкүнчүлүктөрүн, артыкчылыктарын жана коопсуздук чараларын көтөрдү. Бул суроолорго Улуттук банктын орун басары Мелс Аттокуров жооп берди жана 12 контрагенттин изилдөөсү жүргүзүлгөнүн, блокчейн негизиндеги платформа тандалганын билдирди.

Сүрөт: www