Чүй облусунда жер тилкелерин легалдаштырууга 43 миңден ашык арыз түштү

Чүй облусунда жер тилкелерин легалдаштыруунун процесси башталганынан бери аймактын тургундары 43 267 арыз беришти. Бул тууралуу «Биринчи радио» эфиринде Кыргыз Республикасынын президентинин ыйгарым укуктуу өкүлүнүн аппаратынын жетекчиси Назгүл Джоомартова билдирди.

Ал жалпы арыздардын ичинен 31 741 арыз кабыл алынганын белгиледи.

«Амнистия процесси административдик-территориялык реформага чейин башталды жана азыр дагы улантылууда. Биз Бишкекке 17 753 арызды аткарып жөнөттүк», — деп кошумчалады Джоомартова.

Жер амнистиясы 2022-жылы башталганы тууралуу эскертүү керек. Бул процесс Бишкекте 2025-жылдын аягында аяктайт.