Талас облусунда мамлекеттик мүлктү сатуу боюнча коррупциялык схема аныкталды

Талас облусунда 162 миллион сомдон ашык мамлекеттик мүлк сатууга байланыштуу коррупциялык схема табылган.
Райондун прокуратурасы тарабынан жүргүзүлгөн текшерүүдө Бакай-Ата райондук сот өндүрүшү кызматынын жана «Талас балыктары» мамлекеттик ишканасынын бир катар кызматкерлеринин 104,5 гектар жер тилкесин административдик имарат менен 2 миллион 380 миң 729 сомго сатуу пландары болгондугу аныкталды. Ал эми бул объектилердин реалдуу базар баасы 162 миллион 106 миң 520 сомду түзгөн.
Прокуратуранын ыкчам чараларынын аркасында ушул схеманы ишке ашырууга жол бербестен, мамлекеттик менчикти сактап калууга жетишилди.
Бул иш боюнча Кыргыз Республикасынын Кылмыш кодексинин 336-беренеси (коррупция) боюнча кылмыш иши козголгон жана учурда тергөө жүрүп жатат.