Россиянын мектептеринде окуу үчүн кыргызстандыктар орус тилин билүү боюнча тест тапшырууга муктаж

11-декабрда 2024-жылы Россия Федерациясынын Федералдык Жыйынынын Мамлекеттик Думасы "Россия Федерациясындагы билим берүү тууралуу" Федералдык мыйзамдын 67 жана 78-статтыларына өзгөртүүлөр киргизүү жөнүндө мыйзамды үчүнчү окууда кабыл алды.

Эмгек, социалдык камсыздоо жана миграция министринин орун басары Бакыт Дарманкул уулу пресс-конференцияда жаңы мыйзам боюнча чет элдик жарандар, анын ичинде кыргызстандыктар, баштапкы, негизги жана орто жалпы билим берүү программаларына кирүү үчүн орус тилин билүү боюнча тестти ийгиликтүү тапшыруусу керек экенин билдирди.

Ошондой эле, чет элдиктер Россия Федерациясынын чегинде болушунун мыйзамдуулугун тастыктоосу талап кылынат.

Ушул мыйзам 2025-жылдын 1-апрелинен тартып күчүнө кирет.
"Россиянын Билим берүү министрлиги чет элдик жарандардын орус тилин билүүсүн текшерүү боюнча тесттөөнү жүргүзүүнүн тартибин аныктайт. Рособрнадзор орус тилин билүүнүн методикалык камсыздандыруусу, диагностикалык материалдарды иштеп чыгуу боюнча уюштуруу, билимдерди баалоо критериялары жана тестти ийгиликтүү тапшыруу үчүн зарыл минималдуу балл санын белгилөө боюнча жоопту болот", - деп кошумчалады Дарманкул уулу.