КР ТИМ Россиядагы жалпы билим берүү мекемелерине чет элдиктерди кабыл алуу боюнча эрежелерди эскертти

2025-жылдын 1-апрелинен баштап жаңы мыйзам күчүнө кирет, ал Россиянын аймагында мыйзамдуу турган чет элдик жарандарды жалпы билим берүү мекемелеринде окуу үчүн кабыл алуу процессин жөнгө салат. Бул мыйзам, башталгыч, негизги жана орто билим берүү программалары боюнча окууну каалагандар үчүн орус тилин билүү боюнча тестти ийгиликтүү тапшырууну талап кылат.

Россия Федерациясынын Билим берүү министрлиги билдиргендей, тестирлөө мамлекеттик жана муниципалдык мектептерде акысыз жүргүзүлөт.

Кыргыз Республикасы тышкы иштер министрлиги тестирлөө оозеки жана жазуу түрүндө өтөөрүн тактап айтты (биринчи класска кабыл алынган балдар үчүн тек гана оозеки тестирлөө каралган). Тестирлөө учурунда үн жана видео жазуу жүргүзүлөт.

Чет элдик бала тестирлөөсүн тапшыруусу үчүн ата-энесине же мыйзамдуу өкүлдөрүнө орус тилинде же анын ишенимдүү котормосунда Россиянын жалпы билим берүү мектебине төмөнкү документтерди берүү талап кылынат:

- арыз берүүчү менен туугандык байланышын бекиткен документтердин көчүрмөлөрү;

- баланын жана анын мыйзамдуу өкүлдөрүнүн Россия Федерациясынын аймагында мыйзамдуу тургандыгын тастыктаган документтердин көчүрмөлөрү;

- баланын мамлекеттик дактилоскопиялык каттоодон өткөндүгү тууралуу документтердин көчүрмөлөрү;

- баланын жеке маалыматын тастыктаган документтердин көчүрмөлөрү;

- ата-эненин жана баланын салык төлөөчү идентификациялык номерин (ИНН) жана жеке эсептик номерин (СНИЛС) тастыктаган документтердин көчүрмөлөрү (эгер бар болсо);

- баланын айланадагыларга коркунучу жок инфекциялык оорулары жок экендиги тууралуу медициналык жыйынтык;

- ата-эненин же мыйзамдуу өкүлүнүн эмгек ишмердүүлүгүн тастыктаган документтердин көчүрмөлөрү (эгер бар болсо).

Тестти ийгиликтүү өткөргөндө бала мектепке кабыл алынып, эгер тестирлөө өтпөй калса, ага орус тилин үйрөнүү үчүн кошумча билим берүү сунушталат. Кайрадан тестирлөө мурункусунан үч айдан эрте болбошу керек.

Жогоруда айтылгандарга байланыштуу, министрлик Россиянын аймагында болгон Кыргызстандын жарандарына чет элдик балдарын билим берүү мекемелерине кабыл алууга карата мыйзамдагы өзгөртүүлөр менен алдын ала таанышып чыгууга кеңеш берет.