Жогорку Кеңеште суу ресурстары боюнча өзгөчө кырдаал режимин киргизүүнү сунушташууда

Жогорку Кеңештин отурумунда депутат Гуля Кожокулова Кыргызстанда суу ресурстары боюнча өзгөчө кырдаал режимин киргизүү боюнча сунушун айтты.

Ал акыркы отуз жылда Борбордук Азияда суу тең салмагы өлкөнүн пайдасына алынбаганын белгиледи.

“Кыргызстандын кызыкчылыктарын коргоо жана суу ресурстарын бөлүштүрүү боюнча мамлекеттик саясатты иштеп чыгуучу атайын суу ресурстары министрлигин түзүү зарылдыгы бар. Бул маселе боюнча Улуттук илимдер академиясынын адистеринин пикирин да угуу жакшы болмок”, — деп кошумчалады ал.

Суу ресурстары министрлигин түзүү боюнча сунуш мурда да көтөрүлүп келген. 2023-жылы мурдагы айыл чарба министри Аскарбек Джаныбеков мындай министрлик 2024-жылдын аягына чейин түзүлүшү мүмкүн экенин белгилеген. Ошондой эле ушул сыяктуу сунуш менен парламент депутаты Эмиль Токтошев чыгып, бул маселе Жогорку Кеңеште жана Элдик курултайларда талкууланган.