Дыйканнан койлорун уурдап кетишти: Жаш кыз жана аял кармалды

Жалал-Абад облусунун Ички иштер башкармалыгынын басма сөз кызматы Сузак районунда койлорду уурдаганга шектелип эки аялдын кармалып жатканын билдирди.

Укук коргоо органдарынын маалыматына ылайык, 8-февралда саат 22:00 чамасында Сузак айылындагы А. А. 1986-жылы туулган жашоочунун үйүнө белгисиз адамдар кирип, 8 койду уурдап кетишкен.

Уурдалган койлордон келген жоготуу кыйла чоң.

Бул факт боюнча Сузак районунун ИИМи тарабынан Кыргыз Республикасынын кылмыш кодексинин 205-1-беренесине ылайык, мал уурдоо тууралуу кылмыш иши козголду.

Оперативдүү иш-чаралардын жүрүшүндө К. О. 1994-жылы туулган жана С. О. 2005-жылы туулган эки жергиликтүү тургун кармалды. Алар убактылуу кармоо жайына жабылды.

Учурда бул иш боюнча тергөө улантылып жатат.