Дыйкандарга берилген кредиттер жылдык 10% менен берилет, - Министрлик

- Социалдык саясат боюнча Жогорку Кеңештин комитетинин жыйынында депутат Илимбек Кубанычбеков 2025-жылдагы фермерлерди кредиттөө шарттары жана пайыздык ставкасы тууралуу суроо берди.

Бул боюнча суу ресурстары, айыл чарба жана кайра иштетүү өнөр жайы министринин орун басары Самат Насирдинов быйыл ФСХ программасы боюнча кредиттер 10% жылдык пайыз менен берилет деп маалымдады.

Депутат пайыздык ставканын жогорулашы тууралуу тынчсыздануусун белгилеп, мурда кредиттер 6-8% жылдык ставка менен берилгенин айтты.

Министрдин орун басары пайыздык ставканы жогорулатуу кичинекей товар өндүрүүчүлөрдү ири кооперативдерге уюшулууга стимул берүү максатын көздөрүн түшүндүрдү.

Бул учурда «Кыргыз Республикасынын азык-түлүк коопсуздугу жөнүндө мыйзамына өзгөртүүлөрдү киргизүү жөнүндө» мыйзам долбоору биринчи окууда каралып жатты.